قربانی امت مصطفی کیلئے اللہ کا عظیم انعام ہے، شاہ تراب الحق

[قادری]

قربانی امت مصطفی کیلئے اللہ کا عظیم انعام ہے، شاہ تراب الحق



کراچی (پ ر) جماعت اہلسنت پاکستان کراچی کے امیر علامہ سید شاہ تراب الحق قادری نے کہا ہے کہ قربانی حضرت ابراہیم علیہ السلام کی سنت، مالی عبادت اور شعائر اسلام سے ہے۔ انبیائے کرام علیہم الصلوٰة والسلام کا خواب رویائے صادقہ اور وحی الہیٰ ہوتا ہے۔ خواب کی تکمیل کیلئے حضرت ابراہیم  نے اطاعت وامر الہیٰ سے اپنے فرزند حضرت اسماعیل کی قربانی پیش کرنا چاہی تو رب العالمین نے اس کا بدل اور فدیہ مینڈھا بھیج دیا جس کی قربانی فرمائی اور اللہ تعالیٰ نے حضرت ابراہیم کو امتحان وآزمائش میں سرخرو کیا۔ حضرت ابراہیم کی تسلیم ورضا کی عظیم مثال کو اللہ تعالیٰ نے قیامت تک زندہ کر دیا۔ یوم النحر دسویں ذی الحجہ میں امت مسلمہ کا کوئی عمل اللہ کے نزدیک قربانی سے زیادہ محبوب نہیں ہے۔ عیدالاضحیٰ کی قربانی امت مصطفیٰ کے لئے اللہ کا عظیم انعام ہے۔ ان خیالات کا اظہار انہوں نے میمن مسجد مصلح الدین گارڈن میں اجتماع سے خطاب میں کیا۔ علامہ سید شاہ تراب الحق قادری نے کہا حضرت ابراہیم کو عظیم اعزاز حاصل ہے کہ اللہ تعالیٰ نے آپ کی دعاؤں کو قبول فرمایا۔ رب العالمین نے آپ کی اولاد میں حضور خاتم النبینﷺ کو مبعوث فرمایا۔