آیورویدک دوائیں استعمال کرنے کا حکم

[شیرمحمد]

سوال: : کیا آیورویدک دوائیں استعمال کی جاسکتی ہیں ؟ کیونکہ یہ دوائیں ہندوآئیدیولوجی کے مطابق تیار کی جاتی ہیں


جواب: : آئیدیولوجی ہندوستانی طریقۂ علاج ہے جس میں درخت کے پتوں ،جڑی بوٹیوں سے دوائیں بنائی جاتی ہیں اور ان دواؤں میں عموما سونا ، چاندی ، سیسہ ، پارہ اور دیگر دھاتیں ملائی جاتی ہیں ، سوناچاندی اور دیگردھاتیں چونکہ زمین کی جنس سے ہیں ، مٹی کا جوحکم ہے ان کا بھی وہی حکم ہے ، مٹی کا حکم یہ ہے کہ اگر مٹی کھانا صحت کے لئے ضرر رساں ہوتو اس کا کھانا شرعا ممنوع ہے اور اگر مضر صحت نہ ہوتو اس کوکھانے میں کوئی مضائقہ نہیں ، لہذا دھاتوں کا حکم بھی یہی ہے،جیساکہ فتاوی عالمگیری میں ہے
:
وسئل بعض الفقهاء عن اکل الطين البخاری ونحوه قال لا باس بذلک مالم يضروکراهية اکله لا للحرمة بل لتهييج الداء ۔ (فتاوی عالمگيری ‘ ج 5، ص 341‘ کتاب الکراهية ‘ الباب الحادی عشر فی الکراهة فی الاکل وما يتصل به ۔

اگر ان دوائوں پر غیر مسلم جنتر منتر کریں تب بھی اس کی وجہ سے دوائیں حرام نہیں قرار پاتیں، اگر کوئی مسلمان طبیب ان دوائوں میں اثر پیدا کرنے کے لئے معاذ اللہ کوئی شرکیہ کلمات پڑھ رہاہو تو وہ دائرۂ اسلام سے خارج ہوجاتا ہے۔ اور اگر کوئی ماثور دعاء ، آیت قرآنی یا احادیث شریفہ سے پڑہی جائے تو یہ جائز ومستحسن ہے۔ جیساکہ سنن ابوداود ،کتاب الطب ،باب ماجاء فی الرقی میں حدیث پاک ہے
: عَنْ ِ عَنْ عَوْفِ بْنِ مَالِكٍ قَالَ كُنَّا نَرْقِي فِي الْجَاهِلِيَّةِ فَقُلْنَا يَا رَسُولَ اللَّهِ كَيْفَ تَرَى فِي ذَلِكَ فَقَالَ اعْرِضُوا عَلَيَّ رُقَاكُمْ لَا بَأْسَ بِالرُّقَى مَا لَمْ تَكُنْ شِرْكًا۔

ترجمہ:سیدنا عوف بن مالک رضی اللہ عنہ سے روایت ہے انہوں نے فرمایا ہم جاہلیت میں دم کیا کرتے تھے ، ہم نے عرض کیا :یارسول اللہ صلی اللہ علیہ وسلم !آپ اس سلسلہ میں کیا فرماتے ہیں ؟ توحضور صلی اللہ علیہ واٰلہ وسلم نے ادشاد فرمایا تمہاری تعویذیں میرے پاس پیش کرو،تعویذ میں شرک نے ہوتو کوئی حرج نہیں ۔
(سنن ابوداود ،کتاب الطب ،باب ماجاء فی الرقی،حدیث نمبر:3388)
مرقاۃ المفاتیح ،ج 4ص 501میں ہے
:
أن الرقى يكره منها ما كان بغير اللسان العربي وبغير أسماء الله تعالى وصفاته وكلامه في كتبه المنزلة ۔۔۔۔۔ ولا يكره منها ما كان على خلاف ذلك كالتعوذ بالقرآن وأسماء الله تعالى-

لہذاان آیورویدک دوائوں میں اگر کوئی حرام جز شامل نہ کیا جاتا ہو تو اس کے استعمال میں ازروئے شرع کوئی مضائقہ نہیں۔
واللہ اعلم بالصواب –
سیدضیاءالدین عفی عنہ ،
نائب شیخ الفقہ جامعہ نظامیہ ،
ابو الحسنات اسلامک ریسرچ سنٹر ۔
حیدرآباد دکن۔