امامِ اعظم کا والدین سے حسنِ سلوک

[خادم اہلسنت]

والدین سے حسنِ سلوک:


امامِ اعظم رضی اللہ عنہ کے والد گرامی آپکے بچپن ہی میں وفات پا گئے تھے جبکہ آپکی والدہ ایک مدت تک زندہ رہیں ۔ آپ اپنی والدہ سے بے حد محبت کرتے اور انکی خوب خدمت کرتے ۔ آپکی والدہ شکی مزاج تھیں اور عام عورتوں کی طرح انہیں بھی واعظوں اور قصہ گوئی کرنے والے خطیبوں سے عقیدت تھی۔
کوفہ کے مشہور واعظ عمرو بن ذر اور قاضی زرعہ پر انہیں زیادہ یقین تھا اسلیے کوئی مسئلہ پوچھنا ہوتا تو امام اعظم رحمہ اللہ کو حکم دیتیں کہ عمرو بن ذر سے پوچھ آؤ۔ آپ اپنی والدہ ماجدہ کے ارشاد کی تعمیل کے لیے انکے پاس جاتے ۔
وہ بیچارے سراپا عذر بن کر عرض کرتے ، حضور! آپ کے سامنے میں کیسے زبان کھول سکتا ہوں ۔ اور اکثر ایسا ہوتا کہ عمرو کو کوئی مسئلہ کا جواب نہ آتا تو امام اعظم رحمہ اللہ سے درخواست کرتے ، ’’ آپ مجھ کو جواب بتا دیں تاکہ میں اسی کو آپ کے سامنے دہرا دوں ‘‘۔ آپ جواب دیتے تو وہ اسے آپکے سامنے دہرادیتے اور پھر وہی جواب امام اعظم رحمہ اللہ اپنی والدہ کو آ کر بتا دیتے ۔ (الخیرات الحسان:۱۹۶)

آپکی والدہ کبھی کبھی اصرار کرتیں کہ میں خود چل کر پوچھوں گی چنانچہ وہ خچر پر سوار ہوتیں اور امام اعظم رضی اللہ عنہ پیدل ساتھ جاتے حالانکہ آپ کا گھر وہاں سے کئی میل دور تھا۔ وہ خود مسئلہ بیان کرتیں اور اپنے کانوں سے جواب سن لیتیں تب اطمینان ہوتا۔ امام ابو یوسف رحمہ اللہ فرماتے ہیں ، ایک دن میں نے دیکھا کہ امامِ اعظم رحمہ اللہ اپنی والدہ کو خچر پر بٹھائے عمرو بن ذر کے پاس جا رہے تھے تاکہ آپ سے کسی مسئلہ پر گفتگو کرسکیں ۔ آپ اپنی والدہ کی خواہش پر لے جا رہے تھے ورنہ آپکو معلوم تھا کہ عمرو بن ذر کا کیا مقام ہے ۔ یہ سب اپنی والدہ کی خواہش کے احترام کے پیشِ نظر تھا۔ (مناقب للموفق : ۲۹۳)
ایک بار آپکی والدہ نے آپ سے فتویٰ پوچھا۔ آپ نے فتویٰ تحریر فرمادیا۔ وہ بولیں ، میں تو وہی فتویٰ قبول کروں گی جو زرعہ لکھیں گے ۔ چنانچہ آپ اپنی والدہ کی دلجوئی کے لیے زرعہ کے پاس گئے اور فرمایا، میری والدہ آپ سے یہ فتویٰ پوچھتی ہیں ۔تو انہوں نے کہا، آپ زیادہ بڑ ے فقیہ ہیں آپ فتویٰ دیجئے ۔آپ نے فرمایا، میں نے یہ فتویٰ دیا ہے لیکن وہ آپ سے تصدیق چاہتی ہیں تو زرعہ نے لکھ کر کہا، فتویٰ وہی صحیح ہے جو امام ابو حنیفہ رحمہ اللہ نے دیا تھا۔ اس تحریر سے وہ مطمئن ہو گئیں ۔(ایضاً)
جب امامِ اعظم رضی اللہ عنہ کو عباسی خلیفہ نے چیف جسٹس مقرر کرنا چاہا تو آپ نے انکار کیا۔ اس پر آپ کو جیل میں ڈال دیا گیا۔ جلاد روزانہ جیل سے نکال کر آپکو لوگوں کے سامنے کوڑ ے مارتے اور کہتے کہ چیف جسٹس کا منصب قبول کر لیں مگر آپ انکار کرتے ۔ایک دن کوڑ ے کھاتے کھاتے روپڑ ے ۔وجہ پوچھی گئی تو فرمایا، میں اپنی تکلیف کی وجہ سے نہیں رویامجھے اپنی والدہ یاد آ گئیں کہ وہ میری جدائی میں کس قدر مغموم ہونگی۔ دوسری روایت میں ہے کہ جب میری والدہ میرے خون آلود چہرے کو دیکھیں گی تو انہیں کتنا دکھ ہو گا۔(ایضاً)
امامِ اعظم رضی اللہ عنہ فرماتے ہیں ، جب مجھے کوڑ ے لگائے جاتے تھے تو میری والدہ مجھے کہا کرتی تھیں ، ابو حنیفہ! تجھے علم نے اس قوتِ برداشت تک پہنچا دیا ہے ۔ تم اس علم کو چھوڑو اور عام دنیا والوں کی طرح کام کرتے جاؤ۔ میں نے کہا، امی جان! اگر میں علم چھوڑ دوں تو اﷲتعالیٰ کی رضا کس طرح حاصل کروں گا‘‘۔
آپ فرماتے تھے ، میں اپنے والدین کے ایصالِ ثواب کے لیے ہر جمعہ کے دن بیس درہم خیرات کرتا ہوں ، اور اس بات کی میں نے منت مانی ہوئی ہے ۔ دس درہم والد اور دس درہم والدہ کے لیے خیرات کرتا ہوں ۔ ان مقررہ درہموں کے علاوہ آپ اپنے والدین کے لیے فقراء و مساکین میں اور بھی چیزیں صدقہ کرتے تھے ۔(ایضاً : ۲۹۴)

[بینش]

ماشاء اللہ جزاک اللہ خیر